Այսօր՝ նոյեմբերի 25-ին՝ Կանանց նկատմամբ բռնության դեմ պայքարի միջազգային օրը, մեկնարկում է Ընդդեմ գենդերային բռնության 16-օրյա ակտիվության քարոզարշավը։
1991 թվականից ի վեր, ՄԱԿ-ի նախաձեռնությամբ, ամեն տարի նոյեմբերի 25-ից մինչեւ դեկտեմբերի 10-ը՝ Մարդու իրավունքների միջազգային օրը, աշխարհի մարդիկ բարձրացնում են իրենց ձայնն ընդդեմ կանանց ու աղջիկների նկատմամբ բռնության։
Այս տարի 16-օրյակը նշվում է «ՄԻԱՎՈՐՎԵ՛ՆՔ կանանց և աղջիկների նկատմամբ բռնությունը վերացնելու համար» կարգախոսի ներքո։
«Կանայք քաղաքականության մեջ» ծրագիրը միանում է #ԸնդդեմԳենդերայինԲռնության #ակտիվության16օրյակ-ին: Առաջիկա 16 օրերին ՕքսԵՋենի ֆեյսբուքյան էջում էջում կլինեն թեմային վերաբերող նյութեր` ընդգծելու համատեղ ջանքերի, կանանց առաջնորդության զարգացման կարեւորությունը կանանց եւ աղջիկների դեմ բռնության հաղթահարման գործում։
Վիճակագրություն
ՄԱԿ-ի տվյալներով՝
- կանանց և աղջիկների նկատմամբ բռնությունը շարունակում է մնալ աշխարհում մարդու իրավունքների ամենատարածված խախտումը, որից տուժում է ամեն 3 կնոջից 1-ը, և այդ ցուցանիշը գրեթե չի փոխվել վերջին տասնամյակի ընթացքում.
- բռնության ենթարկված կանանց 60 տոկոսից ավելին չի դիմում որևէ տեսակի օգնություն ստանալու համար․
- միջին հաշվով ամեն ժամ աշխարհում ավելի քան 5 կին կամ աղջիկ է սպանվում իր ընտանիքից որևէ մեկի կողմից: Սա նշանակում է՝ միջին հաշվով 11 րոպեն մեկ աշխարհում մեկ կին կամ աղջիկ է սպանվում իր հարազատների կամ զուգընկերոջ կողմից։
Հայաստանում՝
- զուգընկեր ունեցած 15-59 տարեկան կանանց 14.8%-ը երբևէ կյանքի ընթացքում ամուսնու (զուգընկերոջ) կողմից ենթարկվել է ֆիզիկական բռնության՝ վկայում են Հայաստանում կանանց նկատմամբ ընտանեկան բռնության հետազոտության տվյալները․
- Ընդ որում, կանանց մեծ մասը՝ 67%-ը, ոչինչ չի անում բռնությունից պաշտպանվելու կամ բռնությանը պատասխանելու համար։
Ըստ ՀՀ Ոստիկանության տվյալների՝
2022 թ․ հունվար-հոկտեմբեր ամիսներին Հայաստանում գրանցվել է ընտանեկան բռնության 295 դեպք։ Ընտանեկան բռնության դեպքեր առավել շատ գրանցվում են մայրաքաղաք Երևանում, ապա Շիրակում, Արմավիրում, Կոտայքում, Արարատում։ Ընդդեմ կանանց նկատմամբ բռնության կոալիցիայի տվյալներով`
Կոալիցիայի թեժ գծին այս տարվա հունվար-օգոստոսին 4808 հեռախոսազանգ է եղել, մինչդեռ նախորդ տարիներին ողջ տարվա ընթացքում էր 4000-5000 հեռախոսազանգ լինում:Խթանելով կանանց առաջնորդությունը՝ կանխարգելենք կանանց նկատմամբ բռնությունը
#ԸնդդեմԳենդերայինԲռնության ակտիվության 16-օրյակի համատեքստում ընդգծվում է կանանց #առաջնորդության զարգացման կարևությունը՝ որպես կանանց ու աղջիկների իրավունքների և հնարավորությունների խթանման, կանանց ու աղջիկների դեմ բռնության կանխարգելման կարևոր միջոց։
Ըստ «ՄԱԿ-Կանայք» կառույցի՝ կանանց ներկայացվածությունը որոշումների կայացման մակարդակում օգնում է երաշխավորել, որ կանանց և աղջիկների կարիքները դիտարկվեն առաջնային և առանցքային՝ ճգնաժամային արձագանքման, մարդասիրական, սոցիալական և բոլոր այլ տեսակի քաղաքականություններ սահմանելիս և իրականացնելիս:
Այսօրվանից սկսած մինչև դեկտեմբերի 10-ը, #ակտիվության16օրյակի շրջանակում ՕքսԵՋենի ֆեյսբուքյան էջում կներկայացնենք Հայաստանի տարբեր մարզերի հասարակական-քաղաքական կյանքում ակտիվ կանանց դիրքորոշումները կանանց իրավունքների, կանանց նկատմամբ խտրականության և բռնության հաղթահարման, կանանց առաջնորդության և այլ հարցերի շուրջ:
———
Նախաձեռնությունն իրականացվում է «Կանայք քաղաքականության մեջ» ծրագրի ներքո՝ ընդգծելու համատեղ ջանքերի, կանանց #առաջնորդության զարգացման կարևորությունը կանանց և աղջիկների իրավունքների և հնարավորությունների ընդլայնման, նրանց դեմ բռնության հաղթահարման գործում․ https://cutt.ly/d1uTObz
Ծրագիրը ֆինանսավորվում է Միացյալ Թագավորության Լավ կառավարման հիմնադրամի (UK GGF) կողմից և իրականացվում ՄԱԶԾ Հայաստանի կողմից՝ ՕքսԵՋեն հիմնադրամի, ՀՀ տարածքային կառավարման և ենթակառուցվածքների նախարարության և ՀՀ աշխատանքի և սոցիալական հարցերի նախարարության հետ համագործակցությամբ։ Ծրագրի մասին՝ https://cutt.ly/P1umqR1
