Տևողությունը՝ 3 ամիս
Մեկնարկի ամսաթիվը` հունվարի 15, 2024թ․
Մասնակիցների թիվը՝ 25
Անցկացման վայրը՝ Հայաստան
Ծրագրի նկարագիր
Բազմակուսակցական ժողովրդավարության հայկական ակադեմիան ստեղծվել է ՕքսԵՋեն հիմնադրամի և Նիդերլանդների բազմակուսակցական ժողովրդավարության ինստիտուտի համագործակցությամբ: Ծրագիրը ֆինանսավորվում է Հայաստանում Նիդերլանդների դեսպանատան կողմից։
Բազմակուսակցական ժողովրդավարության հայկական ակադեմիան միտված է տարբեր հասարակական և քաղաքական փորձառություն ունեցող անհատներին ապահով տարածք տրամադրելուն, վերջիններիս երկխոսության և տարբեր խնդիրների մասին ունեցած ընդհանուր գաղափարների փոխանակման խթանմանը։
Ծրագրի նպատակն է՝ ձևավորել քաղաքական ձգտումներ ունեցող երիտասարդների նոր սերունդ՝ զինված անհրաժեշտ գիտելիքով ու հմտություններով, որոնք ունեն արդյունավետ առաջնորդ դառնալու և Հայաստանում ժողովրդավարության ու քաղաքացիական ներգրավման ջատագով լինելու մոտեցումներ՝ նպաստելու ժողովրդավարության, մասնակցայնության և առաջնորդության մշակույթի ձևավորմանը։
Խնդիրները
- Նպաստել տարբեր շահագրգիռ կողմերի մասնակցությամբ երկխոսության ձևավորմանը, ձևավորել վստահություն և համագործակցություն՝ Հայաստանի տարբեր փորձառությամբ և քաղաքական ձգտումներ ունեցող երիտասարդների միջև՝ ուսուցանելու և ուղղորդելու, բանավեճերի, քաղաքակական և քաղաքացիական նախաձեռնությունների միջոցով։
- Մասնակիցներին ուսումնական հագեցած ծրագրով փոխանցել ժողովրդավարության, քաղաքական համակարգերի, առաջնորդության վերաբերյալ անհրաժեշտ գիտելիքներ, հմտություններ և մոտեցումներ՝ իրենց համայնքներում և ազգային մակարդակում արդյունավետ առաջնորդներ և ժողովրդավարության ու քաղաքացիական ներգրավման ջատագովներ դառնալու համար։
- Ձևավորել տարբեր փորձառությամբ և քաղաքական ձգտումներ ունեցող երիտասարդների ուժեղ ցանց՝ հիմնված վստահության և համագործակցության վրա՝ Հայաստանում երիտասարդների քաղաքական մասնակցության և առաջնորդության կայունության համար:
Ի՞նչ է ակնկալվում մասնակիցներից
- Մասնակցություն ծրագրի՝ երկօրյա թվով 6 դասընթացներին, որոնք կանցկացվեն 3 ամիսների ընթացքում՝ շաբաթ և կիրակի օրերին (երկու շաբաթը մեկ պարբերականությամբ): Ծրագիրը կազմված է ժողովրդավարության, քաղաքական համակարգերի և քաղաքականություն մշակելու թեմաները խորությամբ ուսումնասիրող դասընթացների մի քանի շրջափուլից։
- Ներգրավվածություն առնվազն երեք ոչ ֆորմալ բանավեճերին, որոնց կմասնակցեն քաղաքական գործիչներ և քաղաքականություն մշակողներ։ Սա հնարավորություն կտա մասնակիցներին գործնականում կիրառելու դասընթացների ընթացքում ձեռք բերված գիտելիքն ու հմտությունները:
- Առաջնորդության հատկանիշներ ցուցաբերած լավագույն ուսանողների մասնակցություն տարածաշրջանային փորձի փոխանակման՝ Վրաստանի ուսանողների հետ։
- Անդամակցություն շրջանավարտների ցանցին՝ շարունակելու մասնակիցների հետագա ներգրավումը և պահպանելու քաղաքական մասնակցության՝ նրանց հետաքրքրվածությունն ու հանձնառությունը։
- Ակտիվ ներգրավվածություն «Բազմակուսակցական ժողովրդավարության հայկական ակադեմիա» հարթակի գործունեությանը, որտեղ ցանցի անդամները տեղեկատվություն ստանալու և փոխանցելու հնարավորություն կունենան։
Ովքե՞ր կարող են դիմել
Տարբեր հասարակական և քաղաքական փորձառություն ունեցող 20-35 տարիքային խմբի անհատներ (բացառության կարգով 35-40 տարեկան տարիքային խմբից կներգրավվի առավելագույնը երկու մասնակից), ովքեր պատկանում են ստորև նշված խմբերից որևէ մեկին․
- քաղաքացիական հասարակության կազմակերպությունների ներկայացուցիչներ,
- քաղաքական կուսակցությունների անդամներ,
- քաղաքական ձգտումներ ունեցող անհատներ:
Ի՞նչ են ստանում ծրագրի մասնակիցները
- Ժողովրդավարության, քաղաքական համակարգերի, առաջնորդության վերաբերյալ անհրաժեշտ գիտելիքներ, հմտություններ և մոտեցումներ՝ իրենց համայնքներում և ազգային մակարդակում արդյունավետ առաջնորդներ և ժողովրդավարության ու քաղաքացիական ներգրավման ջատագովներ դառնալու համար,
- Քննադատական մտածելակերպ, բանավիճելու և համագործակցելու հմտություններ:
- Տարբեր փորձառությամբ և քաղաքական ձգտումներ ունեցող երիտասարդների ուժեղ ցանցին միանալու հնարավորություն՝ հիմնված վստահության և համագործակցության վրա՝ Հայաստանում երիտասարդների քաղաքական մասնակցության և առաջնորդության կայունության համար:
- Բազմակուսակցական ժողովրդավարության հայկական ակադեմիայի ավարտական վկայական և հնարավորություն շրջանավարտների համար նախատեսված այլ ծրագրերին մասնակցելու:
Ինչպե ՞ս դիմել
Դիմելու համար անհրաժեշտ է լրացնել դիմում-հայտը հետևյալ հղումով։
Դիմումների ներկայացման վերջնաժամկետն է 2023 թվականի դեկտեմբերի 15-ը՝ օրվա ավարտը։
Ընտրության չափանիշներ.
- Մասնակիցների թիվը՝ 25
- Գենդերային հավասարակշռություն. առաջնահերթությունը գենդերային հավասարակշռություն ապահովելն է (որևէ սեռից առնվազն 40%)։
- Ներառականություն. ծրագիրը խրախուսում է հաշմանդամություն ունեցող երիտասարդների, էթնիկ փոքրամասնությունների և այլ սակավ հնարավորություններ ունեցող երիտասարդների մասնակցությունը՝ ապահովելու բազմազանություն և ներառականություն:
- Տարիքային շեմ` 20-35 տարեկան, (առավելագույնը երկու մասնակից՝ 35-40 տարիքային խմբից):
- Աշխարհագրական ներկայացվածություն. մասնակիցները կընտրվեն Հայաստանի տարբեր մարզերից: Հավասարակշռված ներկայացուցչություն ունենալու համար խրախուսվում է մարզաբնակ երիտասարդների մասնակցությունը:
- Քաղաքական պատկանելություն. կընտրվեն տարբեր քաղաքական պատկանելությամբ մասնակիցներ՝ նպաստելու բազմազան և ներառական միջավայր ստեղծելուն: Մասնավորապես․
– 30%-ը քաղաքացիական հասարակության կազմակերպություններից
– 30%-ը քաղաքական կուսակցություններից.
-40%-ը քաղաքականությամբ հետաքրքրվող անհատներ, ինչպիսիք են անհատ ակտիվիստները և երիտասարդական կոալիցիաների ու խմբերի անդամները։
Ընտրված մասնակիցները պետք է պարտավորվեն մասնակցել հանգստյան օրերին նախատեսվող բոլոր դասընթացներին և միջոցառումներին ծրագրի 3 ամիսների ընթացքում: Այս պարտավորությունն ապահովում է ուսուցման լիարժեք արդյունավետությունը և նպաստում մասնակիցների պատասխանատվության և նվիրվածության բարձրացմանը:
Հայտերի գնահատում․
Մասնակիցների ընտրությունը տեղի կունենա մինչև 2023 թվականի դեկտեմբերի 20-ը երկու փուլով՝
- Առաջին փուլ։ Դիմում-հայտերի գնահատման հիման վրա կընտրվեն այն դիմումատուները, որոնք կհրավիրվեն հարցազրույցի։
- Երկրորդ փուլ։ Առաջին փուլը հաղթահարած մասնակիցների հետ կանցկացվի հարցազրույց՝ դիմումատուի փորձառությունը, շարժառիթը, ակնկնալիքներն ու կարիքները և ակադեմիայի կրթական ծրագրին համապատասխանությունը հասկանալու նպատակով։
Կդիտարկվեն միայն ընտրության չափանիշներին համապատասխանող դիմորդների դիմումները: Ուշ ուղարկված դիմումները չեն դիտարկվի։
Ընտրության երկու փուլերը հաջողությամբ անցած մասնակիցները կտեղեկացվեն ընտրության արդյունքների մասին էլեկտրոնային փոստով և կհրավիրվեն դառնալու Ակադեմիայի առաջին շրջափուլի մասնակիցներ։
Լրացուցիչ տեղեկությունների համար կարող եք կապ հաստատել ՕքսԵՋեն հիմնադրամի երիտասարդական համակարգող Անի Սարդարյանի հետ՝ զանգահարելով +37496007805 հեռախոսահամարին (երկուշաբթիից ուրբաթ՝ 09:30-17։30) կամ գրելով [email protected] էլեկտրոնային հասցեին: